UNBELIEVABLE MATCH, UNBELIEVABLE MANCHESTER CITY!

 本來五區總辭輸咗喇，市民有權利用選票去表態懲罰，政府卻汝家池塘修例打壓，此一打壓，不但打壓議員辭職自由，最重要是剝奪了市民賞善罰惡的權利，如此一來，法比人惡，便砥觸了人權自由的核心價值。况且新法由林瑞麟泡製，其民望之低有目共睹，他聲稱受廣泛支持欠缺說服力。

大石責死蟹，三子以寡敵眾，反有敗部復活之機。千三條修訂無聊得來有創意，廢話得來也費心思，就當是一台戲，至少提供了娛樂性。

標題原詞林夕〈光天化日〉

一山不能藏二姐，雲在青天水在瓶。

看來鄭汝樺會俏然引退，可惜。兩位鄭局長都是女中邏輯皇，秀外慧中、思路清晰、口齒伶俐。我記得樺姐說過  政府 雖然有責任令 市民 居者有其所，但政府沒有責任令市民 「家家有層樓」。  世紀金句啊。

鬼神之說，信則有不信則無；打齋法事，不是超渡亡魂，而是安撫活人。迷信者心緒不寧，不信者百無禁忌；因此，需要這個儀式的，不是亡魂，而是迷信者。

這個屋邨管理委員會，似乎比不少政客高官更深明自由意志、用者自付之道。你信有鬼，ok，捐錢作法，買個服務，心安理得；你不信鬼，或者不信法事，當然唔關你事，不用付賬。

樓價料延升勢，憂終極一跌

這是今天報載經紀行大老闆對樓市的看法，高見，堅高！作為文字編輯我會說這句話自相矛盾虛過浮雲講咗等於派膠；但作為買家只看到前句，作為賣家只看到後句，便蠢蠢欲動了。一句說話buy sell兩side左右逢源，不愧經紀大佬。

香港電台有個宣傳戒賭嘅單元劇，集集如是講人爛賭借錢再賭再輸家散人亡，只有角色職業不同，橋段重複又重複，班編導奉命要拍呢啲教育電視唔hea先奇，我只係奇怪有多少成效。吊詭在政府呢啲宣傳片如果真係有效政府都幾頭痕，馬會去年度納税148億，薪俸税總額都係443億咋。我覺得馬會已經等如各行各業，每星期搞兩次跑馬收埋波檻就交148億税重有幾十億做善事，如果日日跑馬晚晚六合彩年年世界盃，薪俸稅可以免除！

同事問我告東尼係咪好發，梗係發，發到唔識計，我細個睇住佢騎同德十連勝做冠軍騎師之後又冠軍練馬精英大師，騎練酬金獎金豬籠入水，仲有無從估計既馬主賞賜，嗱馬主個個富豪，准許投注，輸咗冇得話唔俾養馬費，贏咗就梗係唔至在派花紅啦。而且全港馬房得廿零個(?)，練馬師headcount少過地產發展商，幾乎終身任期，真係好過起樓，諗嚟諗去，唯一好過做練馬師既工作，就係做練馬師個仔。

P.S.豪子離開903，我會懷念羅炎虧。

呢條升得急過27銀娛嘅綠線係林鄭月娥續任指數，唔係老吹，係港大民調問卷數據，73.8%市民贊成林鄭續任，只有9.5%主張罷免。林瑞麟嘅指數係45%同14%……，不過係罷免45%！續任14%！可見調查相當寫實。

近兩月林鄭綠氣再急升，74%鶴立雞群，我思疑是否問責史上最高紀錄，此兩月佢曝光率最高嘅工作只有拆僭建，好明顯，新界鄉紳點閙都好，大眾力撐局長。簡直係「誰拆僭建誰便是英雄」。

情况同唐唐僭建犯眾憎一樣，公眾最激氣佢唔覺意係咁咦挖深咗2200呎，喂，好多人400呎都供一世呀大佬。

除咗啲憤青，普遍香港人接受地貴樓貴，亦唔妒忌揾錢多嘅人住豪宅，最唔忿氣反而係特權分子不勞而獲。

而家形勢好有趣，林鄭殺到上74%，佢做政務司司長嘅話，下任發展局局長當然要睇佢頭接力。一旦林鄭告退，下任局長立場有變放軟手腳嘅話，肯定民望大插水，形格勢禁，唔拆屋就要拆彈咯。

車仔守贏巴塞未算奇，拜仁攻贏皇馬先奇。

摩連奴半場計過條數，拜仁作客都唔淆底，對攻的話各入一球對方雙計，博唔過，索性守到尾射十二碼公道啲，段估卡斯拿斯可靠過紐亞少少。

佢啱架，俾我都係咁計。不過德國人非同少可，紐亞冷靜到極，C郎卡卡壓力下根本唔敢射卦網，到後衛腳拉莫斯想卦網就飛機。

 高手過招贏輸都合理無怨，我喜歡卡卡，佩服摩連奴C朗，但更崇拜德國，決賽叠埋心水撐拜仁慕尼黑。車仔守贏巴塞靠忍同LUCK，計攻門機會兩回合應該輸2:8，作客安聯冇咁好彩咯。

格食格，世界盃德國KO英格蘭不敵西班牙，拜仁只怕巴塞，英超波未驚過！

林鄭月娥局長還拖，不能同意更多。三言兩語，把複雜法律說得石梨背啲馬騮都聽得明白，理直自然氣壯，名正自然言順。

皮已正，花生已剝。

 我冇睇桃姐亦唔打算睇所以冇資格讚彈，因為怕肉麻，劉華葉德嫻呢個組合我細細個睇獵應已經頂唔順。

奪命金竊聽2好睇但又未至於經典，劉青雲做得好又未至於非常好，盧海鵬係好但蘇杏旋其實好普通。

 武俠湯唯演得好，單身男女高圓圓直情活潑可愛，龍門周迅我冇睇不過周迅做戲一向好，但成晚好似為桃姐而設，根本就係論資排輩、歧視內地女星、睇唔起娛樂片。

 梁朝偉木口木面嘅戲實有提名，反而大魔術師用功精采冇人欣賞。蕭敬騰片段所見都係冇表情懶型，竟然贏風情萬種嘅連詩雅，啲評審真係好扮嘢。喜愛夜蒲陳靜夠出色出力啦。畫壁鄭爽直情全片亮點，靚過楊冪﹔講真陳嘉上畫皮畫壁都好睇，最好睇啲女仔。那些年女神唔使講，金陵十三釵倪妮靚到冇朋友亦都冇提名。

唉，香港女星呢，喂葉德嫻蘇杏璇舒淇惠英紅吳君如劉嘉玲，真係盛女頒獎禮。

都有個Baby嘅，可惜套夏日樂悠悠麻麻地，全城熱戀仲悶，香港都冇導演開套校園片俾佢拍，得破事兒一節，嘥料，嘥咗Baby最青春嗰幾年。