謝安琪，可算是近年娛樂圈的奇蹟，05年以28歲高齡進軍樂壇，賣歌唔賣樣，造型老土兼核突，而自稱虔誠基督徒的她， 06年尾未婚懷孕，07年大肚下嫁比佢年輕2年既張繼聰，生完仔，神奇地仲索過之前，臉尖左，雙眼皮深左，憑一首《囍帖街》販賣集體回憶，開始踏上天后之路。

作為娛樂圈嘅一份子，八姨太起初都好高興見證一顆新星誕生，起碼欣賞佢有吉士，夠膽做夠膽認，對小生命負責，但日久見人心，有人持紅生驕，囂張臭串擺款真面目日漸浮面，令八姨太同好多同行、歌迷嘅眼鏡碎到一地都係，忍唔住今日都要呻多兩句，比大家知道咩係反面教材。

得罪傳媒兼爆陰毒

還記得初出道，未紅時待人接物非常友善，同記者有傾有講，任問唔嬲，今時今日？呢樣唔俾問，嗰樣唔會答，動輒黑面扮大牌，試過一次，某大報紙記者向謝問及關於她走音的問題，謝即怒睥記者，並跟手向經理人報寸，經理人就打去報館找該名記者上司發狂大罵並投訴，此等行為，實在可能用陰濕來形容，如此有性格，不如以後索性取消訪問時間，齋發新聞稿！

忘恩負義 同行疏遠

舊日好姊妹何韻詩、王苑之今日形同陌路，平日表演過後，歌手們都會埋堆傾偈聊天，但近年記者成日影到，謝安琪孤伶伶獨坐一旁自玩手機無人理，鬼咩！之前未紅最叻扮可憐，話自己公司細，無資源宣傳，博得何韻詩、千嬅等義氣仔女的同情，不時得到機會，不過自從走紅後立即當人冇到，私下仲同人講覺得昔日朋友同佢嘅地位有距離，說話傳到當事人耳邊，所以咪冇朋友做囉，相信除左張繼聰嘅朋友同Eason 外，舊朋友所剩無幾，娛樂圈孤獨精，當之無愧。

死唔認衰 漠視網民意見

謝安琪出席《超級巨聲》當評判時，批評參賽者走音，囂屎輕挑態度(按此睇片)引來網民劣評，於是翻佢舊賑搵返以前嘅走音video，而謝安琪嘅回應竟然係「我水準係點唔使網民批評！」之後，經理人周博賢仲寫咗編〈將「走音」無限放大〉護航，發表「現場演唱時，誰也會走音」謬論，將謝安琪比擬麥當娜，更加形成網上一片聲討之聲，有人仲寫左百幾個理由去解釋謝走音，睇完真係笑到八姨太氣咳，謝安琪，掩耳盜鈴而家唔work o架喇！好自為之啦！