是日為預祝好友 T 生日，一眾兄弟姊妹當然乘機晚飯直落盡興而歸。

是夜晚飯選址為途經幾次都因爆滿關係不得其門而入的板獎自家火鍋，可能吃不到的葡萄真是較為酸的，每次滿座我都禁不住心想：「唓！肯定係因為獎門人關係先咁爆喇，應該一般好味啫，我估ｄ人食個名多．．．」不過經此一晚飯聚，發現原萊佢爆得有道理，我與大班好友已決定日內必定再次 ENCORE！

有自家出品的「火鍋號外」免費派發，介紹最新推介火鍋料，正～

有埋建議灼渌時間，真細心，抵讚！

為了食得盡興加上為免嘈親其他食客，我們一行八人早有準備訂了房間自成一角大食特食（留意房間的最低消費為$3,000），不過亦好在有 book 到房，因為店內環境細細但全場火鍋湯底沸騰煙霧瀰漫，甫走落樓梯到位處地庫的店時幾位好友都已感到嗆鼻攻喉。

湯底選定冬蔭公１個、胡椒豬肚拼鮮甜魚湯１個，除了一大堆火鍋配料外，更點了數款刺身同食（象拔蚌刺身 – 切成粗條狀，超好咬口、花竹蝦刺身 – 爽口鮮甜，蝦頭蝦尾仲可以應要求加 $30 椒鹽炸脆、響螺刺身 – 鮮甜爽三個字講完、三文魚刺身 – 無特別，純粹朋友想食），亦因 minimum charge 關係，望勻餐牌都覺得價錢偏抵，所以我們為求夠數都起勢狂點：

♦ 番茄炸魚皮 x 2 – 好似番茄味薯片咁好味，連平日唔食炸魚皮的我都食咗幾片 ♦ 六白黑豚腩肉 x 2 – 爽口唔易老，係成日食豬夏青食到悶的另一選擇，附有京荵可以同灼伴食 ♦ 花膠仔 – 不大特別，而且量少下次應該唔再點 ♦ 本地粟米 - 經理好強調係本地，因為咁啱日本粟米賣晒喎 ♦ 本地金菇 – 唔記得經理有無話有日本版，但我食依碟係 local ♦ 活海鰻 – 極度新鮮爽口，推介 ♦ 魷魚一夜干 x 2 - 灼一灼就食得，好爽好甜好好味，搶食焦點之一 ♦ 豬粉腸　♦ 駝鳥扣 – 又係好爽好爽的，薄薄一片好好咬口 ♦ 雞子　♦ 廣島蠔 – 好嫩唔易灼老，跟足指示灼 3 分鐘即刻食得，讚 ♦ 八爪魚吸盤墨魚丸 x 2 - 大大粒超彈牙，推 ♦ 本地肥牛 x 2 - 其實幾一般，純粹一眾好友都是牛食愛好者，區區兩大碟已經算係好輕手 ♦ 白蘿蔔 – 又係話無晒日本版，下次真係要試下究竟有乜分別 ♦ 娃娃菜

是夜埋單約 $3,500，比起想像中要抵得多，咁嘅價錢有咁好嘅質素同咁好嘅招呼，超抵呀！以後火鍋局又有多個浦點～   =)

不知道再可以說甚麼了，所以選擇不說。

沉默地、一步一步走著，用行動，讓另一個國度知道我們的感受、訴求。

是日應 Kurtiss 爸爸 – 超忙星級化妝師 Will Wong 之邀，出席了 Kurtiss 仔的第一個生日 party～

朋友 J 講得無錯，其實依個 party 正確ｄ嚟講係屬於小朋友的聚會，並非屬於我們這班大人的，場中一眾小朋友的叫、喊聲此起彼落，幸好大多小朋友都只係手抱 size，並未有追逐叫囂等失控場面出現。

見到白白胖胖的小 Kurtiss，想起佢爸爸當日小學時的靚仔樣，就知 Kurtiss 仔從小被老爸訓練成新一代型人，第時大個都係走型格路線居多；但係再睇埋Kurtiss 仔一見蛋糕就流口水的樣子，就知道佢未必能 keep 得住好似媽媽咁 fit 咁苗條嘅身形喇～而且佢嘅爸爸媽媽仲嚟個大整蠱，用米芝蓮蛋糕嚟影射 Kurtiss 的健美身形，堪稱 2010 年見過最正最貼切生日 cake 呀！   =P

♥ 在此祝 Kurtiss 聽教聽話，承佢爸爸所願，早日學得其一身踩板絕技，做個型靚正聰明醒目讀書又叻又唔駛爸爸媽媽擔心嘅板仔；但記得要好似爸爸咁咁聽媽媽話啊！

以往在公司工作，向來都不會對桌上東東有太多要求或心思．．．
因為日日不停的做做做，那有閒情逸致逐一欣賞桌上大堆大堆雜亂無章的物件？！

不過早前經過 Franc Franc，本是一心買個保冷瓶子天天早上裝著自己榨的果汁返公司飲，誰不知逛著逛著竟然對一隻杯子一見鍾情，連帶放在旁邊的矽膠杯蓋都好像向著我招手似的，結果當然是乖乖埋單火速逃離這個充滿誘惑的危險境地。

現在每個早上都用保冷瓶喝著一口又一口為自己準備的西柚汁／西柚橙汁配早餐，下午則喝著一杯杯熱茶消除午飯後的油膩感覺，雖然兩個時候都是同時在工作中，但．．．用著自己所喜愛的，每次都會突然間有一份說不出的悠閒感覺。 =)

瓶子外圍有啫喱隔層，好讓瓶中的冷凍飲品可以保存得久一點。

白色杯子外邊有通花矽膠包圍，即使盛載熱飲都不會「辣」手；而螢光粉紅矽膠附大假石杯蓋更是襯得一絕，就連不少同事在 pantry 見過後都忍不住問人杯子屬誰？！

其實爸爸跟我一樣，都是對新玩意愛不釋手的一群，而且玩得認真～

上星期爸爸「無喇喇」買了一部三文治機回家，自那天起，便多事了．．．

星期天早上剛起床，媽咪就問我想食乜早餐，妹妹細細聲話我知爸爸買了部三文治機回家，所以佢自己、媽咪同阿妹都已經一人一份飛碟三文治當作早餐了，只剩我．．．此時，媽咪一輪嘴講我知有乜配料可供選擇：「有芝士、火腿、餐肉、鹹牛肉、吞拿魚．．．」我細細聲同阿妹講：「屋企幾時開咗間茶餐廳?」忍不住口答爸媽：「芝士火腿飛碟呀唔該，再跟一杯凍檸水！」媽咪答好，三秒後再問：「乜凍檸水呀？無喎～」

自那個星期天起，我一連７日每朝都被爸爸問我想食乜配料的飛碟三文治，是愛心早餐啊！！！亦很有幸福的感覺～～～

不過，日日食真係會厭的呀．．．隔個星期可以嗎？   =P

好友的仔仔 little Irving 即將滿月，我哋一班哥哥姐姐（其實絕對稱得上 uncle auntie）當然超級雀躍搞個薑醋大食會賀一賀佢喇！

是夜除了主角 – Irving’s 薑醋外，我哋一行十人仲 order 咗一大堆海鮮（計有 New Zealand rock oyster、Coffin Bay oyster、Tasmania oyster、Special Fine de Claire oyster 共 8 打生蠔、Cherrystone clams 1kg、live Manila clams 1kg 及 France whelk 1kg），再有 Irving’s PaPa 主理的 spaghetti with mozzarella cheese & cherry tomato 及 fusilli with mussel in tomato source、再怕唔夠飽叫多個 Pizza Box 4 人餐打底．．．結果，除了海鮮全部於短短 45 分鐘內掃清外，其餘都係剩少少同剩少少．．．

先講講今次ｄ蠔，為迎合各位朋友的口味，所以揀嘅都係較為淡口易接受的種類，而且據以往經驗試過一訂訂過百隻未開口原隻生蠔開到成班壯男死死下成個庇護工場咁，今次我特意找來一間話可提供人手上門包開的 Ocean Three，果區區 $100 per hour 的付出我哋就可以繞埋手等食，當然樂意俾喇！不過 Ocean Three 臨走前話，覺得原來一次過開近百隻蠔認真唔易，佢哋兩個人上嚟開都要成足足兩個鐘至搞得掂，下次會認真考慮加價喎～不過，兩日過後仲有電話打嚟 follow-up 問食後意見，都算係有誠意之作喇，暫時極力推介。（暫時係因為怕之後見我哋次次 order 咁多隻下次唔肯再幫我哋上門開．．． =P）

飲飽食醉後一眾好友玩最新的 Super Mario for Wii，4P 真係超難玩呀，試過行唔夠一呎就全軍覆沒，渣到朋友．．．後來幾經辛苦當中涉及你鬧我我鬧你、大家商量密謀對策，最後先叫做有返ｄ隊形過到幾關咁大把．．．實不相瞞，當日我無限 continue 都死咗差不多成百次，好羞家呀！

是晚跟兩位好友去了尖沙咀亞士厘道新開的日式居酒屋竹亭，由於店主係朋友個朋友，所以是晚主要係一試店內特色食物，睇睇這間樓上小店食物水準如何～

自己一向為食成性，但對零食糖果等則無甚興趣。

早前到 MUJI 走了一圈，見到多款細細包的即沖湯品及即食粉麵等，小小的分量對女士們可算是最為 perfect，除了可令口慾得到滿足外，味道亦十分不錯。

是晚試食了冬陰公即食麵條，包裝內有麵條一包及湯粉一片，依照說明在碗中加入開水後，個人建議將整碗放入微波爐中「叮」一分鐘，其間即可聞得到濃郁的冬陰公香，味道微酸不覺得辣。雖然分量極少三幾啖便已食得清光，不過當作為宵夜或午間小吃的話卻顯得剛好十分合適，是解除為食心癮的一大妙法呢！

兩星期內經歷到生、老、病、死．．．

知道啊，人便是這樣無奈．．．

所以，我由細細個就知道要「珍惜眼前人」才可活得無悔。

昨天在友人家看了 Big Four 的演唱會影碟，看到張偉健唱《身體健康》這一曲時，想起當年曾經患病要連續服藥越年，便是經常聽著這首當日電視收音機都日播夜播的歌。有時，只有病者才能深深體會到健康的重要，其實身體健康的，也要好好照顧自己，才能令身邊愛錫自己的人無憂無慮．．．