裝修格局也非中菜名店的水平，似住家格局的骨子中式小店，但我就最喜歡這種親民的格調，就算是casual wear捧場也不覺突兀，屬舒適的風格。
你看我花在介紹門面裝修的篇幅也不少，如此鋪排當然係好味先會介紹啦！講咁多好說話但原來唔好食，浪費我的文筆也浪費讀者時間，上菜吧！

頭盤分別係話梅桂花車厘茄及陳醋芥茉木耳。車厘茄每粒皆剝皮，灑上桂花及話梅粉，這個食法我首次嘗試，出奇地開胃，話梅和桂花和車厘茄居然係「好朋友」，夾到不可分割，三重遞增的甘酸，為接著的大量菜式打開胃口。木耳和平常可以食到的差不多，陳醋和芥茉的組合很常見，但用靚醋加生磨芥茉的優質組合並不常見。

一鼎響螺淮山杞子燉雞，普通食肆的燉湯料唔足，湯頭不夠濃，化不開都市人被味精侵害的鬱結。但這煲燉湯的足料程度，我未試過湯渣裏的響螺好似五餅二魚一樣食極都仲有！如果你的為食戰鬥力不高，頭盤加湯已經足夠把你KO！

牆上的名菜叫「一帆風順」，即係龍利魚兩食。睇相真係唔係幾開胃，這是很多食肆的通病，以為找拎住部貴價相機的人就識影相。影食物相可以講係影產品相的最高境界，影食物菜式影到出神入化的飲食雜誌攝影師，同《春嬌與志明》的名句一樣，係可遇不可求。
但影得唔靚唔係錯，好食就補番數有找，這菜式睇相不能作準，甚至我覺得，我自己影仲影得靚過佢張相：

將龍利起球，魚身油泡，再反起兩側魚鰭成碗狀，黑椒西芹炒球沒有奪去魚的鮮味，甚為難得，用鮮魚去做更加爽口肉身脆。

食完再將魚身斬件，醮碟面上的酸甜汁，由炒班球變成「松鼠魚」一樣，瞬間變了樣。

另一意頭菜式係黃金麥片蝦球，我們八個人一齊食，食完一碟再追加一碟，實在太好味！將貴價的有機麥片炒香，灑上用咸蛋黃炒香的蝦球，麥片加咸蛋，又一對失散了的「飲食好友」再相聚一刻！

腐皮卷屬功架菜，復活節時和20位好友玩煮飯仔時，其中廚神好友BS就係煮腐皮卷！看他單是切餡料也切了一個小時，絕對考心思，更方知呢度簡單菜式的高難度之處。有心機做就自然有心機去煮，唔使食過，睇字都知好好味啦！

鐵板一口牛的牛肉是優質的安格斯牛，只要唔 over done 就已經好味。

呢度菜睇相未必估到係乜，其實係沙拉骨！淋上面的沙律醬特別烹調過才淋上面，和普通食肆就咁唧沙律醬上面就算，味道簡直天淵之別！

最後填滿個胃的江山笑沙飯，飯粒分明，炒功猶見，絕妙之處係用了咸蛋黃，是名符其實的「黃金炒飯」，粒粒皆有蛋黃香，食佢之時，已經諗定去搵邊部減肥機減肥呀！

當滿載而歸的胃遇上甜品，胃部會神奇地騰出空間盛載，何況係生磨蛋白杏仁茶，如斯認真製作，又係罕見。

食到最後，居然仲有生日蛋糕送？呢間江山笑未免太熱情！卻原來我先知，晚飯當日是新相識好友的正日生日！她從來沒告訴過我呀！一年得一日生日，她就是帶我到這裏用膳，陪她吃一頓大胃王生日飯，可想而知，呢間食肆在她的心目中有多重要！
我們一班好友食完之後，都覺得這間棲身於商業大度的食肆，就算闖入龍潭都不失禮。不過，老闆的經營方針我不便影響，或者這裏恬靜的生態會係他喜歡的特點。但在我的立場，其實江山笑屬於子女帶父母一嘗出色中菜的好地方！雖然我知道，鬧市中一樣有同等優質的中菜食肆，但環境嘈吵，未必能和家人閒話家常。在這裏，就可以和家人促膝詳談，晚上的金鐘，身在都市卻沒有繁囂，就算離開江山笑，附近一帶的寧靜讓你剛才的暢談沉殿、反思，這樣的一餐，你多久沒有試過？

江山笑

地址 : 金鐘金鐘道89號力寶中心1樓商場2B舖

電話 : 2810 6921