哈！其實我一直有keep住整餅的，只係無次次都影相，影完又無過相落電腦，又無打blog而已 襯呢幾日我既整餅人生有了一個大轉變，等我呢幾日一次過打番幾篇先

今次呢個牛油曲奇係專登為我公司一個好可愛既同事Suifi整的，因為佢三月尾生日，於是我上月就早左幾日整定呢個曲奇比佢食。呢D咁可愛既女仔整心形就最岩佢了，仲用左我新買的壓字母印印，壓左佢個名上去，排左個好似寫生日卡咁既次序出黎，我自己都覺得好靚，哈哈～

本身以為整曲奇就易，好快整完啦，點知整到零晨四點，因為壓D字母果度我以為要大力壓到底，點知字母旁邊有少少裂左既位，焗完出黎會裂哂好醜樣，於是夜媽媽又再焗多一次。重要焗完之後我唔記得收埋佢就衝左去訓覺，第二日起身發現淋哂 … 不過照送！哈哈suifi仔一樣好開心

第二次印字母整得好D，原來輕輕力就夠

成功啦！唔知點包裝，用左平時焗muffin果D杯黎裝

除左心形，仲順手整埋其他小動物，扮餅乾果個好得意，送哂比表妹～仲畫左張卡仔比Suifi添！

牛油印模曲奇餅（唔記得左係邊度搵的）

材料:
牛油 100g
糖霜 80g
蛋黃 一個(小)
低筋麵粉 200g

1. 牛油，蛋黃放回室溫。
2. 低筋麵粉先過篩一次。
3. 牛油打至軟身, 分兩/三次加入糖霜加入蛋黃, 繼續打滑。
4. 分兩/三次篩入麵粉, 慢慢拌勻。
5. 麵團會成為酥鬆的粒狀, 將它放入保鮮袋。
6. 用麵棍輕輕壓平。
7. 完成的麵團。把它放入雪櫃片刻。(可視乎情況, 放入雪櫃雪至軟硬適中)。
8. 碌平麵團, 用曲奇模印出形狀。
9. 放入焗爐以175度焗15-20分鐘。(視乎曲奇大小而增加或減少烘焙時間)。
10. 放涼後立即放入密實盒。